Mª Teresa García Guillán, concelleira
do Grupo Municipal Socialista do Concello da Pobra do Caramiñal, o abeiro do
disposto no art. 97/3 do R.O.F., para o seu debate na vindeira sesión plenaria,
presenta ó Pleno unha moción solicitando a elaboración dunha ordenanza municipal reguladora das actividades extractivas de madeira
nos montes e espazos forestais.
EXPOSICIÓN DE MOTIVOS
A actividade madeireira ten suma importancia debido a que boa parte da
superficie municipal está cuberta por especies forestais. Pero asemade, o 25%
da poboación galega é propietaria de parcelas forestais, polo que a incidencia
do monte nas economías familiares é moi importante, e cómpre darlle o valor que
lle corresponde.
Ademais, o monte galego posúe unha elevada produtividade, grazas ó noso
clima e á nosa terra, e isto xera unha manchea de potencialidades, que ben
aproveitadas, poderían incrementar a produción de madeira, facer medrar as
rendas das persoas propietarias, mellorar a xestión das empresas madeireiras,
achegar produto de calidade para a industria transformadora, e con todo isto
xerar máis valor, máis rendas, máis emprego e máis calidade de vida.
Para lograr todo isto é preciso virar a actual situación e camiñar cara
a un novo paradigma de xestión sustentable do monte galego. E iso pasa por
eliminar ou reducir os graves problemas que ten hoxe en día o sector, como son,
entre outros, a escasa cualificación da man de obra, unha distribución de
parcelas minifundista e irregular, ou os importantes impactos sobre a rede
viaria municipal causados pola maquinaria forestal e os labores de extracción e
carga da madeira.
Conscientes da importancia do sector, pero tamén preocupados polos
custos que esta actividade xera nas infraestruturas locais, e polo tanto no
conxunto da poboación, o lóxico sería regular con unha ordenanza os labores de
xestión forestal no Concello, no que atinxa á conservación das vías e así
promover unha xestión racional e sustentable dos espazos forestais.
A ordenanza pretendería acadar a adecuada protección dos recursos
naturais e paisaxísticos, así como velar pola debida conservación das vías
públicas de titularidade municipal, que poden ser obxecto de estragos por causa
das operacións de plantación, corta e saca da madeira. É por iso que a
ordenanza regularía a actividade extractiva de madeira no termo municipal, agás
aquela que poida considerarse de autoconsumo.
Dita ordenanza debería recoller as operacións forestais que se
desenvolvan no Concello e requiriría a presentación dunha comunicación previa,
para informar da realización de actividades extractivas de madeira, e dunha
fianza, para cubrir os posibles estragos que se produzan nas infraestruturas e
no dominio público local.
E por elo, que solicitamos que o Pleno
adopte o seguinte
ACORDO:
Elaborar unha ORDENANZA REGULADORA
DAS ACTIVIDADES EXTRACTIVAS DE MADEIRA NOS MONTES E ESPAZOS FORESTAIS DO
CONCELLO que tería por obxecto a regulación da
actividade forestal consistente na corta e saca de madeira dentro do termo
municipal, para facela compatible coa preservación do medio natural, dos bens
municipais e da seguridade viaria. Esta ordenanza afecta aos actos que se desenvolvan
e que teñan por obxecto a obtención de madeira e o seu transporte (operacións
preparatorias da corta, desprazamentos de vehículos e maquinaria, construción
de ramplas de acceso aos terreos, depósitos de madeira, transporte da madeira
etc.). Con isto pretendemos facer compatible a liberdade de empresa e o
desenvolvemento do sector forestal, coa preservación do medio natural, a
conservación dos camiños e pistas municipais e coa seguridade viaria.
A Pobra do Caramiñal, 09 de xaneiro de 2016.
No hay comentarios:
Publicar un comentario