Pregunta ao Pleno sobre a "Baltarización"

    

Mª Teresa García Guillán, concelleira do PSdeG-PSOE da Pobra do Caramiñal, integrada no Grupo Mixto, ao abeiro do disposto no art. 97.7 do R.O.F., formula ante o Pleno Corporativo para a súa contestación a seguinte

PREGUNTA:

O día 3 de xullo de 2012, o PSdeG da Pobra coñeceu  e comprobou que Estefanía García Lojo, (filla da concelleira de asuntos sociais, Balbina Lojo Olveira), estaba traballando con tarefas de atención ao público na oficina de turismo municipal.

• O artigo 3.Dous .do RD-L 20/2011 de 30 de decembro, de medidas urxentes en materia presupuestaria, tributaria e financeira para a corrección do déficit público. prohibe toda contratación de persoal laboral temporal .

• Por non existir convocatoria para dita praza, nin anuncio oficial na prensa  nin na propia páxina web do Concello.

• Por tratarse da filla dunha concelleira do Partido Popular da Pobra o que supón un acto de evidente nepotismo.

• Por incorrer unha vez máis este goberno local nun acto que outorga privilexios aos seus familiares directos facilitándolles o acceso ó traballo en detrimento do resto d@s veciñ@s

• Por incumprir co principio constitucional de igualdade, mérito e capacidade.

Por todo isto:

¿Hai algunha subvención doutra Administración para a contratación de persoal da Oficina de turismo?

¿Cal foi o criterio que se utilizou para darlle o traballo a esa moza?

¿Qué capacitación profesional se esixiu para optar a dito posto de traballo?

¿Por qué non se lle dou publicidade?

¿Por qué se vulnera o principio constitucional de igualdade, mérito e capacidade?

Por outra banda o día 6 de xullo 2012, o alcalde saíu nos medios de comunicación asegurando que Estefanía García Lojo non tiña ningunha relación laboral co concello, e que voluntariamente abre a oficina de turismo municipal porque quere estudar Turismo:

¿Qué acordo de responsabilidade ten o concello con dita moza  para deixarlle unha instalación pública?

¿Ten o concello contratado algún tipo de seguro de responsabilidade para cubrir os posibles desperfectos no inmoble mentres está aberto ó público baixo a responsabilidade dunha persoa que non ten ningunha relación contractual co concello?

¿Qué seguro ten contratado o concello para cubrir os posibles accidentes  da moza voluntaria?

REFLEXIÓN DO MOMENTO POLÍTICO

Levamos, xa, cinco longos anos, dende o afondamento do sistema financeiro nos EE.UU. Lévase escrito moito, e no noso país, o goberno de Zapatero foi  víctima da desfeita que o corte do creto provocou na construcción e no parón do consumo, no incremento do desemprego e nos recortes da protección, e na baixada nos ingresos do Estado. As medidas que se tomaron daquela non arranxaron o problema, aínda que algunhas ían no bo sentido. Haberá tempo de volver sobre o asunto.

Pouco se parece  hoxe, España , ao que fomos nos derradeiros anos que precederon ao comezo da crise. Pasamos de ser un país punteiro e respectado, sobre todo fora , e con pouca contestación dentro -se esquecemos a batalla campal da dereita, dende o mesmo momento que perderá as eleccións naqueles días desgraciados do 11M, e os tres seguintes.

Non queremos buscar xustificacións na comparanza co momento actual. Ó contrario, a realidade é ben esclarecedora. Salarios máis baixos, máis paro, máis impostos, máis represión, menos seguridade social, menos escolas e universidades, becas e investigación.

A todo isto hai que engadir o papel dos tribunais de “xustiza”, os “medios de comunicación”, a estafa da “banca”, o silencio cómplice da cúspide, e da base  fascista da igrexa, a mentira como instrumento “político” e de “comunicación”.

Isto non se fai para facer cadrar as contas, en contra do que din os farsantes que ocupan o goberno. As contas cadran en moitos países da Unión Europea –os nórdicos, por exemplo- e non se teñen que facer os recortes salvaxes nin recorrer ó medo  e a mentira como ferramentas para levar as cousas de todos.

A dereita aproveita a crise social para facer un cambio de modelo. Queren empobrecer ó Estado –empobrecendo ós traballadores e facilitando ós ricos o fraude fiscal- para que non poida facer fronte ós servizos que viña prestando: pensións, sanidade, ensino, etc. Deste xeito facilitan a entrada, no que é de todos, das empresas afíns. Esas que empregan familiares é benqueridos da dereita, como no caso de Bankia, e das tramas coma as do Gürtel, de todos coñecidas. Velaí a herdanza da que tanto falaban. As contas trucadas estaban, e seguen estando, alí onde a dereita mete as súas miserias, os seus familiares, e outros delincuentes.

É verdade. Estamos nunha trampa da dereita, que está utilizando a banca, que nos tima a todos para terminar de desmantelar o que queda do estado democrático. Os cartos do rescate serven para cubrir as perdas dos bancos –non para cretos ás familias ou empresas- e os réditos computan no déficit público, encarecen os tipos de interese “no Mercado” é, deste xeito, “xustifican” máis recortes. Ou sexa. Pagámoslle ós bancos, para que desfagan os servicios sociais. Así de triste, así de lamentable. Veremos salarios, condicións laborais e pensións asiáticas de aquí en adiante. Iso si, os impostos indirectos terán niveis de países europeos que atacarán ás clases menos podentes.

Pero, sendo todo isto moi perigoso para o noso presente, e unha ameaza clara para os máis novos, temos una boa nova: non temos que agacharnos coma escravos, non é algo inevitable, se somos capaces de ter un pequeno compromiso social e participar algo máis na vida pública.  

Non debemos seguir esperando a que veñan milagres a rescatarnos. Témolo que facer entre todos. É posible, sen necesidade de recorrer a máis sacrificios dos que xa imos ter que soportar. Todo canto fagamos mellorará, de xeito ven visible, as posibilidades individuais comas as colectivas. En contra das intencións da dereita, España debe ser un país que aposte pola competencia cos países punteiros e non cos de baixos custes.

Na Pobra tamén se libra esa batalla. Non se esquecen de ter empresarios afíns que propician a subordinación e non ás capacidades profesionais. En moitas empresas rexen os métodos clientelares por riba das relacións empresa-traballador. Est.e clientelismo político alcanza cotas descaradas e os xeitos da dereita son parellos ós do goberno do Estado. Pero sobre todo son o sustento das bases da dereita. As bases dos que queren levar a España ós mares da China, en limusinas americanas.

Todo isto non fai que A Pobra destaque para ben. Pola contra, perdemos en comparanza cos concellos veciños, como deixan ben ás claras as Directrices de Ordenación do Territorio, que o alcalde non rexeita. Iso si, non esquece subir as taxas e impostos para ocupar todo o que ten na cabeza: que todo vaia peor, e que se manteña unha cidadanía dócil, aborregada, que bota moitos foguetes o ar, e enche as furnas con votos da dereita. Ese é o seu programa. Tamén fai encontros cos xubilados, e outras inauguracións que pagamos todos, é despois pásalles a correspondente subida de “aportacións” nos recibos que remite ás contas bancarias. Todo moi de dereitas, con sorriso “profidén” e curta estatura..

A Pobra debe cambiar de ruta, de corporación e de alcalde. Non só a Pobra. Queremos que o noso concello encete un novo xeito de ver a vida pública dende o poder más próximo á todos nos. Os concellos.

Un concello innovador na relación e a cooperación con outros concellos, que nos abra a posibilidade de participar en sectores como o enerxético, o financeiro e con avanzadas políticas fiscais e medioambientais. Un concello onde se recupere, para as persoas a prioridade nas rúas e nas estradas. O respecto dos vehículos a motor cas normas de convivencia, cos outros usuarios, e co medio ambiente.

Un concello que incorpore á cidadanía o interese polas cosas que poden mellorar o nivel social. Fundamentalmente a xuventude. Faremos propostas innovadoras para o espacio cultural, festivo e deportivo da mocidade. Sobre todo contando ca súa opinión e experiencia en todos os lugares nos que queiran participar. Un concello para comezar un cambio dende as bases, que leve a Galicia e a España ao sitio onde non poidan volver a baixala os especuladores e os seus cómplices. Xa somos moitos. Queremos contar contigo. Hai un sitio connosco, agardándote.

PASAMOS DE VILA REFERENTE NA COMARCA A NADA

Por inoperancia, desidea ou incompetencia, pasamos de ser unha vila referente na comarca a ter a mesma consideración de vilas próximas como Lousame ou Mazaricos.

Chegamos a esta situación despois de que a consellería competente en materia de política territorial elaborara o Avance cas Directrices de Ordenación do Territorio de Galicia, que ademais foi recollida nunha publicación, e que foi remitido a todas ás administracións locais e a máis de 500 entidades públicas e privadas para que achegasen cantas observacións, propostas e alternativas considerasen oportunas.

Nesa Memoria inicial establecíase a Vilagarcía como cabeceira e Santa Uxía de Ribeira, Rianxo, Cambados e O Grove como subcabeceiras para fortalecer o desenvolvemento urbano da Ría de Arousa.

Continuaba dicindo esa primeira publicación que as cabeceiras e subcabeceiras xunto a outros núcleos como Aguiño, Palmeira, A Pobra do Caramiñal, Boiro deberían canalizar a nova oferta de desenvolvementos urbanos.

A estrutura inicial da comarca foi cambiada, Ribeira pasou a ser cabeceira e municipios que non aparecían como subcabeceiras como Porto do Son e Boiro foron incluídos porque os responsables políticos deses pobos non se conformaron cas infraestruturas, equipamentos e servizos de carácter estrutural que se lle ofrecían aos seus concidadáns. Pasou un longo proceso de exposición pública e aínda que a Xunta ten competencias para decidir onde fixar as cabeceiras e subcabeceiras en base a estudos rigorosos previos, as administracións locais tiveron que mostrar novos informes que avalaran eses cambios.

A Pobra non introduciu ningunha modificación, cando este asunto é moi relevante para o futuro crecemento e desenrolo do pobo. Este goberno local conformouse, ou nin sequera leron dita publicación e tampouco convocou, nin informou aos grupos políticos presentes na corporación para presentar unha alegación, en tempo e forma, polo ben da vila, porque este pobo non é nin dos do PP nin dos outros, é dos cidadáns e cidadás.

A Pobra do Caramiñal se ve completamente relegada, está no grupo de vilas consideradas como núcleo principal dos restantes concellos e parroquias rurais nos que unicamente se concentrarán as dotacións básicas de tipo administrativo, docente, sanitario, cultural de carácter local.

Corresponden as cabeceiras e subcabeceiras acoller dotacións como:

· centros educativos con unha oferta completa das diferentes modalidades de ensino establecidas na ESO, no bacharelato e na formación profesional.

· Aumento do número de especialidades e medios de diagnóstico e tratamento nos centros de saúde e hospitais.

· Progresivo desenvolvemento de novas dotacións de ensino especial e non obrigatorio, (escolas de idiomas, de música, artes e oficios, etc), equipamentos deportivos axeitados para o desenvolvemento de competicións oficiais, etc.

· Oficinas de xestión administrativa da Comunidade Autónoma, oficinas de Facenda e da Seguridade Social, servizos de Protección Civil.

· Fortalecemento dos servizos asistenciais.

Estamos a recoller o sentir dunha parte relevante de veciños inmensamente preocupados polo futuro do noso pobo, xa que si non somos subcabeceiras de comarca, nunca poderemos optar a dotacións como as descritas.

Pasamos de ser unha vila referente na comarca a ter a mesma consideración de vilas próximas como Lousame ou Mazaricos.

MOCIÓN PRESENTADA NO REXISTRO DO CONCELLO

Mª Teresa García Guillán, concelleira do PSdeG-PSOE da Pobra do Caramiñal, integrada no Grupo Mixto, ao abeiro do disposto no art. 97.3 do R.O.F., para o seu debate na vindeira sesión plenaria, presenta ó Pleno unha moción solicitando a modificación puntual do Decreto 19/2011 co obxecto de incorporar a Pobra do Caramiñal no grupo de concellos clasificados como subcabeceiras de comarca.

EXPOSICIÓN DE MOTIVOS

O Decreto 19/2011, do 10 de febreiro, polo que se aproban definitivamente as directrices de ordenación do territorio deixou fóra da clasificación como cabeceira ou subcabeceira de comarca ao concello da Pobra do Caramiñal.

A normativa aprobada polo goberno galego esquece á Pobra do Caramiñal como concello e deixao relegado e nunha posición absolutamente secundaria alonxada da súa relevancia no plano territorial e económico.

Cabe recordar que a Lei 10/1995, do 23 de novembro, de ordenación do territorio de Galicia, configura as directrices do ordenación do territorio (DOT) como un instrumento de carácter global, expresión da política territorial, que debe constituír o marco xeral de referencia establecendo as pautas espaciais de asentamento das actividades, de acordo coas políticas sociais, económicas e culturais emanadas da comunidade, integrando,se é o caso, as emanadas desde o Estado, así como as propostas que xurdan desde as entidades locais.

O conselleiro de Medio Ambiente, Territorio e Infraestruturas aprobou inicialmente as directrices de ordenación do territorio mediante a Orde do 24 de xuño de 2010, incluíndo o informe de sustentabilidade ambiental, na que se acordou así mesmo someter a información pública as directrices de ordenación do territorio aprobadas inicialmente con todos os documentos que as integran, incluído o informe de sustentabilidade ambiental para os efectos establecidos na Lei 10/1995, de ordenación do territorio de Galicia, e na Lei 9/2006, do 28 de abril, sobre avaliación dos efectos de determinados plans e programas no ambiente.

O día 22 de febreiro de 2011 publicábase no Diario Oficial de Galicia o acordo de aprobación definitiva das directrices de ordenación do territorio de conformidade coa Lei 10/1995, do 23 de novembro, de ordenación do territorio de Galicia.

Temos que recordar que as directrices de ordenación do territorio (DOT) teñen como finalidade básica definir un modelo territorial para Galicia que permita orientar as actuacións sectoriais, dotándoas de coherencia espacial e das referencias necesarias para que se desenvolvan de acordo cos obxectivos xerais da política territorial de Galicia, conformando unha acción de goberno coordinada e eficaz. Neste sentido ten levantado un gran malestar a posición irrelevante na que deixa o goberno galego ao concello da Pobra do Caramiñal á hora de planificar a política territorial na área xeográfica na que se atopa o citado concello.

No marco da Lei de ordenación do territorio de Galicia as directrices son o instrumento que ofrece a visión global da ordenación territorial de Galicia e serven como referencia para o resto das figuras de planificación e para as actuacións que desenvolvan tanto as administracións coma os particulares.

É nese contexto onde se pretende, con planificación, consolidar unha rede de vilas e de pequenas cidades capaces de dotar dunha adecuada base urbana e de servizos ao conxunto do territorio galego é aí onde A Pobra do Caramiñal se ve completamente relegada, pois a Pobra está no grupo de vilas consideradas como núcleo principal dos restantes concellos e parroquias rurais nos que unicamente se concentrarán as dotacións básicas de tipo administrativo, docente, sanitario, cultural de carácter local. Pasamos de ser unha vila referente na comarca a ter a mesma consideración de vilas próximas como Lousame ou Mazaricos.

Corresponden as cabeceiras e subcabeceiras acoller dotacións como:

· centros educativos con unha oferta completa das diferentes modalidades de ensino establecidas na ESO, no bacharelato e na formación profesional.

· Aumento do número de especialidades e medios de diagnóstico e tratamento nos centros de saúde e hospitais.

· Progresivo desenvolvemento de novas dotacións de ensino especial e non obrigatorio, (escolas de idiomas, de música, artes e oficios, etc), equipamentos deportivos axeitados para o desenvolvemento de competicións oficiais, etc.

· Oficinas de xestión administrativa da Comunidade Autónoma, oficinas de Facenda e da Seguridade Social, servizos de Protección Civil.

· Fortalecemento dos servizos asistenciais co fin de aumentar a cobertura dos grupos sociais que demandan atención en función das características demográficas e socioeconómicas de cada zona.

Estamos a recoller o sentir dunha parte relevante de veciños inmensamente preocupados polo futuro do noso pobo, xa que si non somos subcabeceiras de comarca, nunca poderemos optar a dotacións como as descritas.

Chegamos a esta situación despois de que a consellería competente en materia de política territorial elaborara o Avance cas Directrices de Ordenación do Territorio de Galicia, que ademais foi recollida nunha publicación, e que foi remitido a todas ás administracións locais e a máis de 500 entidades públicas e privadas para que achegasen cantas observacións, propostas e alternativas considerasen oportunas.

Nesa Memoria inicial establecíase a Vilagarcía como cabeceira e Santa Uxía de Ribeira, Rianxo, Cambados e O Grove como subcabeceiras para fortalecer o desenvolvemento urbano da Ría de Arousa.

Continuaba dicindo que as cabeceiras e subcabeceiras xunto a outros núcleos como Aguiño, Palmeira, A Pobra do Caramiñal, Boiro deberían canalizar a nova oferta de desenvolvementos urbanos.

A estrutura inicial da comarca foi cambiada, Ribeira pasou a ser cabeceira e municipios que non aparecían como subcabeceiras como Porto do Son e Boiro foron incluídos porque os responsables políticos deses pobos non se conformaron cas infraestruturas, equipamentos e servizos de carácter estrutural que se lle ofrecían aos seus concidadáns. Pasou un longo proceso de exposición pública e aínda que a Xunta ten competencias para decidir onde fixar as cabeceiras e subcabeceiras en base a estudos rigorosos previos, as administracións locais tiveron que mostrar novos informes que avalaran eses cambios.

A Pobra non introduciu ningunha modificación, cando este asunto é moi relevante para o futuro crecemento e desenrolo do pobo. Este goberno local conformouse, ou nin sequera leron dita publicación e tampouco convocou, nin informou aos grupos políticos presentes na corporación para presentar unha alegación, en tempo e forma, polo ben da vila, porque este pobo non é nin dos do PP nin dos outros, é dos cidadáns e cidadás.

Por todo iso, este grupo que represento solicita a adopción dos seguintes

ACORDOS:

1º.-Que o equipo de goberno informe, faga partícipes e comunique a todos os grupos políticos presentes na corporación, todas aquelas propostas e cuestións que podan modificar o devir ou o futuro do pobo.

2º.- Instar á Xunta de Galicia a:

Facer unha modificación puntual do Decreto 19/2011 polo que se aprobaron as Directrices de Ordenación do Territorio co obxecto de incorporar ao concello da Pobra do Caramiñal no ANEXO de Determinacións das directrices de ordenación do territorio (concretamente no apartado 2.2.5) como subcabeceira do sistema urbano intermedio e parte integrante deste nivel do sistema de asentamentos de Galicia.