Según o INE no ano 2006 tiñamos
10.001 h; no 2007 / 9.923; e descendendo
cada ano ata chegar ao ano 2012 que contábamos con 9.664 h.
Recordarlle ao Sr.Maceiras que se non hai xente non hai
pobo, cómpren persoas para facer un pobo. É un alumno avantaxado da dereita e prometeu
o crecemento do pobo nos sucesivos compromisos electorais, os datos son
incontestables: en vez de medrar, cada día morremos un pouco mais.
MOCIÓN COMPLETA
Mª Teresa García
Guillán, concelleira do PSdeG-PSOE da Pobra do Caramiñal, integrada no Grupo
Mixto, ao abeiro do disposto no art. 97.3 do R.O.F., para o seu debate na
vindeira sesión plenaria, presenta ó Pleno unha moción relativa ó constante e alarmante descenso da poboación do
Concello.
EXPOSICIÓN
DE MOTIVOS
Galicia perde poboación cada año que pasa, sen embargo na Pobra do
Caramiñal xa é un mal endémico.
Levamos 35 anos de democracia, dos que 28 foi gobernado este Concello
pola dereita (sen contar que herdamos un alcalde franquista reconvertido a
demócrata), e unicamente durante 8 anos houbo un goberno de cor socialista. É
imprescindible recordalo porque estamos afeitos a que este equipo de goberno,
tanto nas sesións do Concello Pleno como nos medios de comunicación, bote a
culpa das súas desfeitas, da inoperancia, a ese Alcalde socialista cando case
foi efémero no período democrático; catorce anos sen interrupción do Partido
Popular debían ser suficientes para desenvolver unha vila envexa da comarca e
non apostar por un municipio de terceira categoría (Directrices Ordenación
Territorio).
Desde o ano 2001, sendo sempre o Alcalde Isaac Maceiras, o Concello da
Pobra do Caramiñal ven perdendo poboación de xeito constante e determinante,
mentres por contraste os concellos limítrofes suman habitantes nestes anos: un
estudo realizado na Universidade da Coruña explica polo miúdo como os concellos
de Boiro, Ribeira, Noia e Rianxo medran en poboación e o seu envellecemento é
inferior a outros concellos galegos.
Malia que a Pobra conta co primeiro polígono industrial da comarca, o
panorama demográfico foi empeorando cada vez máis, e xa as persoas que veñen a
traballar ao Polígono da Tomada viven maioritariamente nas poboacións veciñas.
Durante bastante tempo, o Sr. Alcalde ten manifestado en repetidas
ocasións que coa entrada en vigor do PXOM a poboación do municipio ia aumentar
considerablemente, pero desgraciadamente asistimos ano tras ano ao proceso
contrario á previsión do Sr. Maceiras, polo que a poboación estase a reducir de
xeito alarmante, e logo de baixar da primordial barreira dos 10.000 habitantes,
cada vez estamos máis lonxe de recuperala.
Os nosos devanceiros deixáronnos unha Vila de
referencia económica e social, mesmo cabeceira de comarca, mesmo co primeiro
polígono industrial portuario de Galicia (Barrio dos Cataláns), e co actual goberno municipal so presumimos
de ter sido –porque a burbulla xa rebentou- un produto inmobiliario para
foráneos con residencia estival e efémera, cos custos que isto representa para
o resto do pobo.
Cómpre actuar urxentemente con políticas activas de recuperación e
fixación de poboación, combinando políticas que garantan a conciliación
familiar, axudas económicas, vivendas con prezos más alcanzables, e fomentando
que os mozos permanezan ca consecución de emprego, aumentando a natalidade e
mantendo un crecemento sostible.
Por todo iso, este grupo que represento solicita
a adopción dos seguintes
ACORDOS:
1º.- Que o goberno do Concello da Pobra acometa unha fonda campaña de
concienciación fomentando o empadroamento de todos/as aqueles/as que residan no
termo municipal de xeito habitual e non figuren inscritos/as, e de xeito
especial aqueles outros que sexan propietarios/as de vivendas de protección
oficial ou promoción pública, recordarlles a obriga de residir no municipio.
2º.- Actuar con políticas activas de fixación de poboación, que garantan
a conciliación e crear iniciativas atractivas para que os mozos non teñan que
emigrar.
A
Pobra do Caramiñal, 06 de maio de 2013.
No hay comentarios:
Publicar un comentario