Mª Teresa García Guillán, concelleira do PSdeG-PSOE da Pobra do
Caramiñal, integrada no Grupo Mixto, ao abeiro do disposto no art. 97.3 do
R.O.F., para o seu debate na vindeira sesión plenaria, presenta ó Pleno esta MOCIÓN
SOBRE AS PENSIÓNS, en base a seguinte
EXPOSICIÓN DE MOTIVOS
O Goberno de España aprobou non actualizar co IPC as pensións de 2012
cando as persoas pensionistas xa adquiriran este dereito, para manter o seu poder adquisitivo, por lei dende primeiros de ano. Ademais
suspende o dereito á revalorización das pensións no 2013.
Na notificación feita en xaneiro de 2012 ao conxunto das persoas
pensionistas de España, o goberno comprometíase e garantía a compensación pola
desviación que puidera producirse con respecto á evolución real da inflación.
Declaracións públicas de varios responsables políticos do Partido
Popular e do Goberno de Mariano Rajoy garantían este dereito reflectido na
lexislación sobre a Seguridade Social.
Así mesmo, os orzamentos do Estado para 2012 incluían a previsión de
revalorización anual das pensións.
Unha vez coñecido o IPC de novembro o Goberno tiña que poñer en marcha
unha “paga compensatoria” pola diferenza acumulada no ano 2012 entre o
incremento do 1% das pensións en xaneiro e a desviación de 1,9 puntos polo dato
do IPC de novembro de 2,9%.
Ademais a partir de xaneiro de 2013 debía incrementar as pensións
actuais nun 1,9% para evitar a perda de poder adquisitivo e sumarlle a
previsión de inflación do ano 2013 que o goberno sitúa no 1%.
O Goberno, unha vez pasados os procesos electorais en Galicia e
Cataluña, decide que, primeiro, os pensionistas non van percibir a paga de
desviación da inflación de 2012 e segundo, que esa actualización do IPC
tampouco se consolide no ano 2013.
Unha perda por tanto de poder adquisitivo que, en Galicia sacude ás
familias de xeito notorio, debido a que temos as pensións máis baixas de España
pola prevaleza de pensionistas do Réxime Especial Agrario e do Réxime Especial
do Mar.
Moito máis nas provincias do interior que teñen un comportamento do IPC
superior ao promedio galego, como é o caso de Lugo cun IPC do 3,1% .
Reputados economistas cifran a perda por pensionista/ano para o caso
galego en 950 euros de media sumando outros conceptos incluídos no “poder
adquisitivo”.
Si só temos en conta as cifras da NON revalorización e da NON paga da
desviación do IPC podemos calcular que para os pensionistas galegos a perda é
neste primeiro momento de máis de 260 millóns de euros, a espera da
discrecionalidade que vai presidir o incremento das pensións no ano 2013, si é
que se produce.
Ademais, é preciso ter en conta o copago farmacéutico, impostos (IRPF,
IBI) e taxas e canons como o da auga, que xuntos conforman unha importante
perda de poder adquisitivo próxima aos 405 millóns de euros.
Diante disto o Goberno da Xunta permanece indecentemente mudo, cando na
recente campaña electoral toda a teima de Núñez Feijoo foi negar que o Goberno
de Rajoy fose a conxelar as pensións, algo que resultou certo, porque
finalmente optou por rebaixalas de certo e aventurar esta rebaixa a futuros
anos.
Por todo o exposto, este grupo
que represento solicita a adopción dos seguintes
ACORDOS:
PRIMEIRO.- Instar ao Goberno Central á revogación do acordo do Consello
de Ministros de 30 de novembro de 2012, para non actualizar co IPC as pensións
de 2012 e suspender o dereito á revalorización das pensións en 2013.
SEGUNDO.- Instar á Xunta de Galicia á defensa dos dereitos dos e das
galegas pensionistas, a través das medidas necesarias, políticas ou xurídicas,
diante do Goberno Central, antepoñendo os intereses da cidadanía galega fronte
a intereses partidarios.
TERCEIRO.
Dar traslado destes
acordos ao Parlamento Autonómico de Galicia, así como ao Congreso e ao Senado
de España.
No hay comentarios:
Publicar un comentario