Plan Especial de Protección de Reforma Interior do casco histórico

Mª Teresa García Guillán, Concelleira polo PSdeG-PSOE, no que no seu nome e representación comparezo, e como mellor proceda en Dereito, EXPOÑO:

PRIMEIRO.- O Plan Xeral de Ordenación Municipal (PXOM) do Concello de A Pobra do Caramiñal foi aprobado definitivamente o día 3 de xullo de 2008, e publicado no Diario Oficial de Galicia do día 1 de setembro de 2008.

SEGUNDO.- No documento “Estudo de sostiblidade ambiental, impacto territorial e paisaxístico” contido no PXOM reflíctese que o casco antigo, resultado da fusión espacial das dúas antigas pobras medievais, está bastante ben conservado, malia ás desafortunadas intervencións pouco sensibles que se produciron durante un longo período de tempo, e malia a unhas Normas Subsidiarias Municipais e un Estudo de Detalle das Prazas que contiñan a especulación inmobiliaria e consecuente desaparición do valor histórico e patrimonial de este conxunto histórico, manténdose no seu espírito a trama urbana inicial e evitando a desaparición do parcelario orixinal.

TERCEIRO.- Na Memoria do PXOM, o epígrafe 2.f) relativo a “normas urbanísticas” fai mención a que “o casco antigo da Pobra do Caramiñal, pola súa particular configuración e problemática urbanística específicas, é remitido a un Plan Especial de Protección, para o que se delimita o seu ámbito e se establece unha normativa transitoria que haberá de rexe-las actuacións sobre el en tanto non se aprobe o correspondente planeamento de carácter xeral. A seguir indícase que sobre ese recinto o Plan Xeral ven a confirmar a imposibilidade de abordar calquera tipo de regulación que non teña un alcance específico e pormenorizado, con nivel de detalle que excede o tratamento asumido polo planeamento de carácter xeral.

CUARTO.- O propio Catálogo do PXOM, de xeito transitorio e preventivo, incorpora unha grande cantidade de edificacións que polo seu carácter morfolóxico e histórico, revelador do espírito construtivo dos séculos XVIII e XIX, convén manter para futuras xeracións. Pero resulta insuficiente, en tanto en canto non é suficiente manter casos puntuais senón o conxunto.

QUINTO.- Que, a tal efecto, a propia Normativa do Plan Xeral establece unha ordenanza específica que no seu capítulo 7 define como “Ordenanza 5ª. Casco antigo. Normativa transitoria”, grafiada nos planos de ordenación na cor específica e abranguendo unha contorna perfectamente definida que coincide co que o PXOM define como Casco Antigo da Pobra do Caramiñal. O apartado “Plan Especial de Protección e Reforma Interior do Casco Antigo” di textualmente:

“O ámbito do casco antigo da Pobra do Caramiñal presenta uns valores ambientais notables, tanto polas características da súa estrutura urbana de orixe histórica como pola presenza de edificacións singulares, entre as que destaca a Torre de Bermúdez, declarada Monumento Histórico-artístico, conformando un conxunto cunha particular problemática urbanística que esixe unha ordenación pormenorizada que garanta a súa protección e recuperación. Conforme a estas circunstancias deberase proceder á elaboración dun Plan Especial de Protección e Reforna Interior para o ámbito do Casco Antigo que se delimita neste Plan Xeral”.

Continúa o texto, a seguir:

“O mencionado Plan Especial deberá ser sometido á súa aprobación no prazo de dous anos a partir da aprobación definitiva do presente Plan Xeral, recomendándose pola urxencia das súas finalidades, que a súa elaboración se desenvolva en paralelo á propia tramitación do Plan Xeral”.

Tamén engade:

“De acordo co establecido no art. 69 da Lei de Ordenación Urbanística e Protección do Medio Rural de Galicia, antes da aprobación definitiva do plan especial, deberase solicitar o informe preceptivo e vinculante da Consellería correspondente en materia de urbanismo e ordenación do territorio nos termos sinalados polo art. 86.1.d.”.

SEXTO.- Transcorreron CORENTA E TRES MESES (moito máis dos DOUS ANOS establecidos no Plan Xeral) e non temos nin aprobado definitivamente nin sequera comezado a tramitación do Plan Especial de Protección e Reforma Interior, o que indica o NULO INTERESE POLO URBANISMO E POLO PATRIMONIO que demostra este equipo de Goberno, que en maioría absoluta podía telo xa aprobado. Séguense a conceder licenzas ao abeiro de unha Ordenanza Provisional.

SÉPTIMO.- Segundo o Catálogo do PXOM, de xeito transitorio e preventivo, incorpora no Casco Antigo as seguintes edificacións para as que establece unha protección. Segundo o establecido polas Normas Complementarias e Subsidiarias Provinciais, así como pola Lei de Patrimonio Cultural, entre outras:

-          50 metros, cando se trate de elementos etnográficos como hórreos, pombais, cruceiros, etc..

-          100 metros, cando se trate de elementos de arquitectura relixiosa (igrexas, capelas, mosteiros, conxuntos parroquiais, santuarios, cemiterios, etc...), de arquitectura civil (pazos, casas señoriais, edificios sinalados, pontes, vías romanas, muíños, pesqueiras, etc...) ou de arquitectura militar (baterías, murallas, castelos, etc...).

-          200 metros, cando se trate de restos arqueolóxicos (petróglifos, mámoas, dólmenes, castros, etc...)

A área de protección mídese dende o punto máis exterior do ben a protexer e da súa leira: no caso de unha igrexa ou conxunto parroquial, por exemplo, dende o muro perimetral, incluíndo as zonas nas que hai vestixios. Dende aí, trázase o círculo de protección, de 50, 100 ou 200 metros.

A relación que comprende o Casco Antigo da Pobra do Caramiñal é a seguinte:

FICHA	EDIFICACIÓN PROTEXIDA	LOCALIZACIÓN	ÁREA DE PROTECCIÓN
30	Torre de Bermúdez	Rúa do Castelo	100 metros
31	Igrexa do Castelo e todo o Adro do Deán	O Castelo	100 metros
32	Igrexa e Adro de Santa María	O Caramiñal	100 metros
33	Capela e Portada do Cemiterio	Rúa de San Roque	100 metros
34	Portada do Cemiterio do Deán	Praza da Feira	100 metros
35	Murallas do Adro do Deán	Campo da Feira	100 metros
36	Casa Grande de Aguiar	Rúa do Couto	100 metros
37	Pazo do Couto	Rúa do Couto	100 metros
38	Hospitaliño de Pelegríns	Rúa da Feira, 48	100 metros
39	Cristo do Pichón	Praza do Cristo do Pichón	50 metros
40	Cruceiro Trala Igrexa	Santa María	50 metros
41	Cruceiro do Adro do Deán	Santiago do Deán	50 metros
42	Cruceiro do Adro do Deán	Rúa do Castelo	50 metros
44	Cruceiro de Casto Dios	Rúa San Lázaro	50 metros
45	Fonte dos Catro Canos	Praza de Maura	50 metros
46	Fonte do Couto	Rúa do Castelo	50 metros
47	Fonte da Praza do Castelo	Praza do Castelo	50 metros
50	Casas con laudas gremiais	Adro do Deán	100 metros
51	Casa de servizo da Casa de Aguiar	Adro do Deán	100 metros
52	Casa da Cadea	Rúa da Ponte	100 metros
53	Casa con patín	Rúa Rafael Calleja, 10	100 metros
54	Casa Torre do Deán de Santiago	Rúa Tetuán, 41	100 metros
55	Casona da Familia Rábago	Cardenal Patiño, 1	100 metros
56	Casona dos Montenegro	O Xogo da bola, 5	100 metros
57	Casa Gótica do Patín	Rúa da Feira, 25-29	100 metros
58	Casona de Acuña	Praza da Constitución, 3	100 metros
59	Farmacia de Tato	Rúa da Paz, 12	100 metros
60	Antigo Casino	Rúa da Paz, 12	100 metros
61	Casa do Concello	Rúa Gasset, 28	100 metros
62	Casa con cruz e portalón	Rúa San Roque, esquina Gasset	100 metros
63	Edificio de vivendas	Santos Mieites e Díaz de Rábago	100 metros
64	Peirao do Centenario	Paseo marítimo Castelo	100 metros
65	Reitoral de Santa María e Casa do Carmo	Adro de Santa María	100 metros
66	Reitoral de Santiago do Deán	Díaz de Rábago, 18	100 metros
67	Casa da Estrela	O Xogo da Bola, 35	100 metros
68	Casa con elementos tardogóticos	Rúa Castelao, 22, 24	100 metros
69	Casa da Balconada	Rúa da Feira, 16	100 metros
70	Casa con escudo	Rafael Calleja, 21	100 metros
71	Casa con escudo	Rúa Tetuán, 60	100 metros
72	Casa na Praza do Cristo do Pichón	Praza do Cristo do Pichón	100 metros
73	Conxunto vivendas arquitectura popular	Rúa do Castelo, 1, 3, 5	100 metros
74	Edificio con placa en fachada	Rúa de Galicia, 1	100 metros
75	Casa do escritor	Praza V. García Martí, 15	100 metros
76	Villa Eugenia	Rúa de San Roque,	100 metros
77	Villa	Rúa San Lázaro	100 metros
78	Edificio de vivendas	Rúa Cardenal Patiño, 29	100 metros
79	Edificio de vivendas	Rúa da Paz, Praza de Maura	100 metros
80	Edificio de vivendas	Rúa da Paz, 17	100 metros
81	Edificio de vivendas	Rúa da Ponte, 57	100 metros
82	Vivenda	Paseo do Areal, 1	100 metros
83	Vivenda	Paseo do Areal, 2	100 metros
84	Vivenda	Paseo do Areal, 3	100 metros
85	Vivenda	Paseo do Areal, 4	100 metros
86	Casa de José Barreras	Paseo do Areal, 5-6	100 metros
87	Vivenda	Paseo do Areal, 7	100 metros
88	Vivenda	Paseo do Areal, 17	100 metros
89	Vivenda	Paseo do Areal, 18	100 metros
90	Almacén	Paseo do Areal,, 18-20	100 metros
91	Naves	Paseo do Areal	100 metros
93	Alameda. Xardíns de Valle-Inclán	Rúa da Paz	100 metros
94	Campo da Feria	Campo da Feria	100 metros

OITAVO.- Polo que se pode apreciar nos gráficos que se achegan, para dar idea do ámbito de protección do Plan Xeral, reflíctense algúns dos círculos en relación coa Lei de Patrimonio, pero unicamente de 11 dos 61 elementos protexidos.

É dicir,

TODO O ÁMBITO DO CASCO ANTIGO da Pobra do Caramiñal ESTÁ PROTEXIDO.

NOVENO.- Calquera licenza que se conceda dentro do ámbito da Ordenanza 5ª do PXOM, sexa do tipo que sexa, É NULA DE PLENO DEREITO se non conta coa autorización previa e vinculante da Comisión Territorial do Patrimonio Histórico da Coruña, en aplicación da Lei 8/1995, de 30 de outubro, do Patrimonio Cultural de Galicia.

O que significa que para a tramitación de calquera licenza de calquera clase (obra maior, obra menor, establecementos comerciais ou hostaleiros, etc..) dentro do Casco Antigo da Pobra do Caramiñal debe previamente ir á Comisión da Coruña, o que atrasará a súa concesión un par de meses, a súa concesión sen o previo informe anula a propia licenza, e sobre todo, o Concello ten a OBRIGA de vixiar e inspeccionar consonte as obras non dean comezo antes da concesión das dúas autorizacións, tal e como prevé o Regulamento de Disciplina Urbanística de Galicia.

No informe que emita o técnico municipal de urbanismo deberá constar a distancia que cada licenza solicitada dista de cada un deses elementos protexidos, e é obriga profesional e como empregado público de comprobala.

DÉCIMO.- Son responsables das licenzas que non conten coa autorización previa e vinculante tódolos membros da Corporación que formen parte da Xunta de Goberno que as concederon, alén das responsabilidades que poidan ser esixidas ao técnico municipal que as informe sen dar conta á Xunta de Goberno de estes estremos.

UNDÉCIMO.- PARECE MÁIS LÓXICO, PRÁCTICO, ÁXIL, INTELIXENTE E DILIXENTE para os cidadáns e cidadás desta Vila dispor de un instrumento urbanístico preciso, no que se definan polo miúdo as características de tódalas edificacións do Casco Antigo da Pobra do Caramiñal, que APORTE SEGURIDADE XURÍDICA aos habitantes de esta Vila, que poidan saber o que poden e o que non poden facer nas súas propiedades. En vez de depender de presentar unha ou varias propostas e sometelas á decisión da Comisión do Patrimonio Histórico da Coruña.

Así o entendo eu e así o entenden as persoas que eu represento, como así o entenderon no seu día os Concellos que xa dispoñen de un Plan Especial de Protección de Reforma Interior dos seus cascos históricos, como é o caso de Noia, como o caso de Muros ou o caso de Padrón, que son os máis próximos, pero tamén outras vilas e cidades coa calidade urbanística e patrimonial que ten A Pobra do Caramiñal, como son os casos de Betanzos, Viveiro, Ribadavia, Baiona, Cangas, ou o mesmo Santiago de Compostela.

Non tendo constancia de que o Concello da Pobra do Caramiñal teña iniciados os trámites para a redacción do Plan Especial de Protección e Reforma Interior do Casco Antigo da Pobra do Caramiñal, e a fin de evitar tódalas consecuencias citadas anteriormente, SOLICITO:

1)      Tome vostede coñecemento de todo o anteriormente exposto, déalle traslado del ao Aparellador Municipal e aos membros da Xunta de Goberno Local, para que teñan pleno coñecemento das súas responsabilidades e actúen dilixentemente e consonte a Dereito.

2)      Dea comezo, de inmediato, á tramitación de un Plan Especial de Protección e Reforma Interior do ámbito do Casco Antigo da Pobra do Caramiñal, que está perfectamente delimitado e definido como Ordenanza 5ª do Plan Xeral.

Tome coñecemento de que se non adopta estas medidas no presente mes, darei coñecemento ás administracións competentes na materia para que adopten as medidas oportunas na súa función de SUBROGACIÓN pola inacción municipal (artigo 215 da LOUGA), dando conta tamén á Axencia de Protección da Legalidade Urbanística (APLU).

O CONCELLO DA POBRA POSICIÓNASE CON “GALICIA BILINGÜE” EN PROL DO CASTELÁN

A asociación sen ánimo de lucro “Galicia Bilingüe”, que se autodefine como “apartidista e independiente” ven de presentar recentemente en Vigo unha revista de vintecinco páxinas á que denominan “Vosotros” (dispoñible en dúas versións, unha en castelán e outra en castelán e galego na páxina www.galiciabilingue.es) na cal o Concello da Pobra comparte co de Ribeira –ambos gobernados polo PP- unha páxina completa a toda cor anunciando a súa marca turística… en castelán.

En ambas versións, castelán e “bilingüe”, o Concello da Pobra anúnciase institucionalmente en castelán, posicionándose dentro desa suposta liberdade de elección do idioma que di defender “Galicia Bilingüe” a favor do castelán, utilizando o medio de expresión desa asociación como plataforma para a definición da preferencia política do Sr. Maceiras.

A revista, que debe ser o vehículo de expresión do que o colectivo que a edita entende por "pluralismo lingüístico", repite na súa curta estensión o topónimo castelanizado “PUEBLA DEL CARAMIÑAL” -ou abreviado como “PUEBLA” ou “LA PUEBLA”- en máis dunha ducia de ocasións, sen que ao Sr. Maceiras lle trema o pulso á hora de asociar a imaxe da vila co perfil editorial da publicación, a pesar da utilización impropia e reiterada do nome do concello, sen amosar respecto algún polos graves sucesos producidos nos anos oitenta e noventa en torno ao emprego ilegal do topónimo histórico castelanizado.

Os Socialistas da Pobra consideramos desafortunado que o Concello da Pobra vincule a súa imaxe turística cunha revista de marcado corte ideolóxico -cuxo nome é unha parodia do da revista "Nós", referente do galeguismo-, no que constitúe unha clara vontade política do PP de sufragar correntes de opinión afíns con miras pre-electorais, asumindo gastos de difícil xustificación nun contexto de desmantelamento sistemático dos servizos públicos, e lamentamos o uso partidista do idioma como manobra de distracción sobre os duros recortes nos niveis máis esenciais dos dereitos básicos, abrindo sen pudor vellas feridas tocante ao topónimo do Concello con manifesto desprezo da paz social conseguida arredor do topónimo oficial, que como Alcalde debera defender.

¿QUÉN LLE CRE?

As promesas incumpridas de Isaac Maceiras, que emprega un acto pagado cos cartos de todos os pobrenses para facer propaganda unha vez máis.

Logo de 8 anos sen facer a gardería, e de prometela no Nadal de 2004 "como se fora un agasallo de Reis", volve agora á carga, cando non dá xestionado un Concello que ten na creba e que ten que ir a plan de axuste e pasa o tempo e gasta os cartos en actos, como a comida do venres, totalmente superflua e só para saír na foto. 

O concello da Pobra tivo necesariamente que acudir ao Plan da axuste, (endebedamento  para pagar ós provedores)por un importe de 1.554.091,49 euros. Entre estes figuran  as empresas de catering e demais establecementos de hostalería onde o equipo de goberno acude para organizar os convites, ( tales como a celebracións bandeira azul,  ágapes bandeira, inauguracións varias, xantar 3ª idade,….). 

O señor Maceiras debíase adicar a buscar os cartos para pagar as débedas destas cuchipandas e dos seus fastuosos actos de inauguración e deixar de prometer o que non vai facer... Pode que pense o señor alcalde que os pobrenses temos pouca memoria, pero a hemeroteca é terca e o día 25 de Nadal de 2004 saíu con que ía facer unha gardería para cen nenos: onde está, oito anos despois? É este o gran xestor da Pobra? Ben se ve: estamos afogados pola súa mala xestión.

Según conta a prensa o mandatario xa mostrou os planos de situación desa hipotética gardería ao invitado que trouxo a festa  dos vellos do pasado venres,  e ¿porqué non llos ensina aos lexítimos representantes dos veciños na Corporación? Será porque unha vez máis ten pensado desaloxar a unha asociación de veciños do local que ten concedido. Un colectivo máis silenciado.

CA CRISE SEGUIMOS FACENDO ESCAPARATISMO E PROPAGANDA POLÍTICA

A voceira do PSdeG-PSOE da Pobra do Caramiñal non asistirá o XIII xantar dos maiores, organizado polo Goberno do PP da Pobra que se celebrará o venres 4 de maio, no Polideportivo Municipal de Venecia por solidaridade cas persoas que están pasando necesidades, por entender que debemos distribuír os cartos dos veciños ca maior dilixencia, por coherencia, por convicción.

Desde o Goberno do Estado estanse a facer recortes que afectan a toda a poboación e de maneira moi especial ao colectivo dos maiores. Faise a máis importante agresión o Sistema Público de Saúde dende a chegada da democracia co pago de medicamentos por parte dos pensionistas, obrigase aos usuarios a pagar as ortoprótesis (cadeiras de rodas, muletas e calzas, xeonlleiras, tobilleiras), obriga tamén a pagar os produtos dietéticos,  por exemplo vai a afectar a alimentación nutricional que se lles subministra por vía oral ou por sondas de alimentación ós grandes dependentes e desnutridos, afecta ao transporte sanitario non urxente,  aos maiores de 26 anos que non cotizan a seguridade social que perden o seu dereito a asistencia sanitaria, a DEPENDENCIA, afecta gravemente a educación, a investigación, repercute no nivel de vida das familias cas subidas do gas, da luz, co IRPF, ….

Son tantos e tan graves  os recortes que a Administración Local debe racionalizar e priorizar os recursos dos que dispón, hai actividades as que se pode renunciar por ser prescindibles ou posiblemente as realizan por facer escaparatismo e propaganda política. 

Na relación de facturas con data de emisión 2 de marzo de 2011, facilitada pola intervención do concello a día 2 de marzo de 2012 aparece aínda sen pagar “resto xuntanza 3ª idade 2007” 11.590,40 e “comida 3ª idade 2010” 11.932,11 euros, sumadas estas cantidades ao  resto de comidas oficiais do equipo de goberno teñen unha débeda de case 30.000 euros en gastos dos que se poden prescindir como unha inauguración dun paseo que nos valeu aos Pobrenses 1.043,25 euros. Hai que ter en conta que xa pasou máis dun ano desde esa última fiscalización polo tanto a débeda seguiría aumentando tanto no gasto en festas como no resto de conceptos.

Por solidaridade cas persoas que están pasando necesidades, por entender que debemos distribuír os cartos dos veciños ca maior dilixencia, por coherencia, por principios, non asistirei a dito xantar. Non é falta de respecto aos maiores que asistan, nin desprezo por un día que se reencontran e que o pasan ben é unha cuestión de establecer prioridades e dedicar eses recursos a cubrir as necesidades básicas da poboación como poden ser atender a dependentes.

Desde o goberno de España están esixindo continuos esforzos ás familias pero estarían nunha mellor situación si as Administracións deran exemplo ca elección das súas actividades.