Moción sobre a supresión dos partidos xudiciais

Mª Teresa García Guillán, concelleira do PSdeG-PSOE da Pobra do Caramiñal, integrada no Grupo Mixto, ao abeiro do disposto no art. 97.3 do R.O.F., para o seu debate na vindeira sesión plenaria, presenta ó Pleno unha moción para rexeitar a supresión dos partidos xudiciais.

EXPOSICIÓN DE MOTIVOS

O Goberno ven de anunciar a supresión dos Partidos xudiciais existentes en Galicia, para concentrar ós xuíces nas capitais provinciais e crear Tribunais de instancia. En Galicia esa medida suporá a desaparición de 41 partidos xudiciais e unha fonda alteración do funcionamento da xustiza, da accesibilidade dos cidadáns e dos custos derivados.

A unha cidadanía espallada no territorio, debe corresponder unha planta dos servizos públicos que facilite o achegamento dos cidadáns. Os actuais partidos xudiciais veñen dando resposta á litixiosidade pero tamén á proximidade. Esquecer esta non mellora aquela, só a cambia de lugar. Pero crea outros problemas ós profesionais da xustiza, funcionarios, avogados, procuradores,  ás entidades auxiliares, ós concellos, e sobre todo ós cidadáns.

Esta medida centralizadora forma parte dunha política xudicial fondamente lesiva para os cidadáns. O Goberno do Estado paralizou  os procesos de modernización tecnolóxica, de posta en funcionamento da nova oficina xudicial e de creación de prazas. Está anunciada a modificación dos Rexistros Civís. Agora proponse a desaparición dos partidos xudiciais e  a concentración da actividade xurisdicional nas capitais de provincia.

O Goberno promulgou unha nova lei de taxas, disuasorias pola súa contía e restritivas para as persoas con menos recursos. Agora a supresión de partidos xudiciais incrementará os custos de desprazamento. Fica esquecida a defensa dos dereitos dos cidadáns e o acceso a unha tutela xudicial efectiva, como garantira o artigo 24. 1 da Constitución Española.

Por todo iso, este grupo que represento solicita a adopción dos seguinte

ACORDO

O Pleno do Concello de A Pobra do Caramiñal insta á Xunta de Galicia  a reclamar do  Goberno de España o mantemento dos catro partidos xudiciais da comarca, especialmente o partido xudicial de Ribeira, cos seus respectivos xulgados.

A Pobra do Caramiñal, 12 de maio de 2014.